Jy kry optree-geleenthede waar mense wat in ontwikkelende talent belangstel na jou luister. Wanneer jy op die vlak kom waar jy jou eie liedjies/musikale werke skryf of liedjies sing/musikale werke speel wat vir jou geskryf is, is dit handig om dit voor gehore op te voer en hulle terugvoer te kry. By WOW!-STêR kry jy gereeld daardie geleentheid.

Kry opbouende raad van beoordelaars uit die musiekbedryf. Elke keer wat jy deelneem kry jy nuwe raad en advies wat, as jy dit volg, jou sal help om gevorm te word tot ‘n kunstenaar in die ware sin van die woord.

As jy die WOW!-kategorie by enige van die talentvertonings haal, tree jy op dieselfde verhoog en in dieselfde program op as een van ons land se nasionale kunstenaars en/of ontwikkelende talent wat reeds wye ervaring opgedoen het. Hierdie kunstenaars deel met jou hoe hulle opgang gemaak het sodat jy daaruit kan leer.

Elke deelname verdien vir jou punte op die OOS-KAAPSE GOUE DROME WOW!-STêR ranglys. Na elke talentdag word ‘n ranglys (met akkumulerende punte) bekendgemaak. Hierdie ranglys bepaal uiteindelik wie die beste gevorder het gedurende die jaar en te kan deelneem aan die GOUE DROME WOW!-STêR GLANSAAND op 27 November 2010 om gekroon te word as die 2010 GOUE DROME WOW!-STêR! Die ranglys word in ‘n e-nuusbrief sowel as op die webblad www.talente.co.za bekendgemaak.

Om in die musiekmark ‘n deurbraak te maak, is dit van die uiterste belang om jou eie liedjies/musikale werke te skryf of iemand te kry om vir jou liedjies/musikale werke te skryf. By hierdie geleenthede sal jy kennis maak met liedjieskrywers en hoe om die wiel vir soiets aan die rol te sit.

Jy kan self besluit waar jy wil deelneem … in Port Elizabeth, Kirkwood of Graaff-Reinet of oral. Lees meer hieroor ondertoe in hierdie dokument. As jy in ander dorpe/stede deelneem het jy meer kanse om as finalis vir die GOUE DROME WOW!-STêR FINALE GLANSAAND te kwalifiseer.

Jou foto (sodra jy dit aan ons voorsien) met ‘n kort biografie verskyn op ons webblad (www.talente.co.za) waarvandaan jy bespreek kan word vir optredes. Dit word afgehaal wanneer jy nie vir ‘n volgende talentvertoning ingeskryf het nie, tensy jy steeds die volle inskrywingsfooi betaal al neem jy nie deel nie.

By die GOUE DROME WOW!-STêR talentvertonings sal jy hoor hoe om oorspronklike werk op te neem sodat dit radio-kwaliteit opnames is en hoe jy kan maak om dit op radiostasies te laat speel. Ons help ook met raad oor hoe om DVD’s te laat maak, en wat jy moet doen as jy ‘n musiekvideo wil laat maak.

Goedgekeurde deelnemers kry gratis toegang tot alle WOW!-STêR talentvertonings (die konserte van die nasionale kunstenaars en gevorderde Oos-Kaapse talent op dieselfde aande ingesluit).

Van tyd-tot-tyd bied ons spesiale liedjieskryfwerkwinkels aan waarvoor deelnemers spesifiek kan inskryf. Nadere besonderhede sal metteryd bekendgemaak word.

Jy leer baie van choreografie en stemafrigting en kunstenaarsafronding deur net te luister na die beoordelaars se kommentaar. Maar ons is ook in die posisie om jou in kontak te bring met die beste choreograwe en stemafrigters asook met persone wat jou van meer persoonlike en gereelde kunstenaarsafronding kan bystaan sodat jy nog vinniger vorder.

Goue Drome kies net die beste venues waar hulle talentvertonings plaasvind. Hierdie jaar is dit die VODACOM Amfiteater by die Boardwalk. Almal wil graag daar optree en die voordeel is dat baie mense meer bewus sal wees van jou as deelnemer as ons ‘n venue gebruik wat gesog is.

Ons maak soos gewoonlik baie seker dat die klankpersoneel geduld het met ontwikkelende talent en ook die beste moontlike toerusting gebruik by elke geleentheid.

Verskeie groot pryse kan gewen word by elke talentdag. In 2009 is sowat R16000 totaal in kontant weggegee by al ons talentdae. Dan was daar nog ander groot pryse soos gratis stemafrigting by die ILOREEZ MEYER SANGAKADEMIE, gratis choreografie, etekoepons by THE PAXTON HOTEL, en ‘n naweek vir twee by die luukse THE PAXTON HOTEL. Pryse gaan hierdie jaar afhang van die mate waarin die talentvertonings ondersteun word. Hoe meer deelnemers en hoe meer toeskouers, hoe groter die pryse.

Met al hierdie ervaring rondom jou en al die kunstenaars wat elkeen elke keer iets nuut na die verhoog toe bring, word jy gestimuleer om baie, baie beter te doen as wat jy op eie stoom sou doen. En voor jy jou kan kry, sal mense vir jou sê: “WOW, maar jy het drasties gevorder. Jy’s ‘n WOW!-stêr!”

Nooit, dit is maar net ‘n fraksie van daardie koste! Jy skryf in vir elke talentvertoning en dit kos jou slegs slegs R60 per talentvertoning as jy ‘n solo-item lewer of ‘n klein bietjie meer as jy ‘n duet of groep inskryf.

Alle kommunikasie met deelnemers en die gehoor vind by wyse van e-posse plaas. Dit is dus van die uiterste belang dat u ‘n e-posadres bekom of die e-posadres van ‘n betroubare vriend of familielid gebruik.

Geen uitsonderings sal ongelukkig gemaak word nie.

Maak seker dat u e-posadres op elke inskrywingsvorm aangedui is en dat ons aandag gevestig word daarop as die e-posadres verander.

Hoekom WOW!-STêR vertonings hou en hoeveel keer?

Hoekom?

Die GOUE DROME WOW!-STêR het ten doel om ‘n platform vir opkomende Oos-Kaapse talent te skep waar hulle gereeld kan optree, hulle standaard telkens verbeter en uiteindelik ‘n meningvolle bydrae tot die musiekbedryf kan maak. Die belangrikste doelwit van die kompetisies is om plaaslike talent aan te moedig om eie werk (of werk wat spesifiek vir hulle geskryf is) op te voer en radiokwaliteit opnames daarvan te maak – natuurlik elkeen volgens sy eie pas (ontwikkelingsgewys en finansiëel gesproke). Die WOW!-STêR vertonings is reeds bekend as die grootste enkele bydraende faktor tot talentontwikkeling in die Oos-Kaap en ons beplan om dit landwyd uit te brei in die nabye toekoms.

Hoeveel keer?

Die 2010 WOW!-STêR  talentvertonings vind soos volg plaas:

Talentvertonings word op die nagenoemde datums aangebied (datums mag gewysig word op kort kennisgewing). Die onus rus op die deelnemers om vooraf seker te maak van elke datum – hou gerus hierdie webblad dop vir die nuutste inligting: www.talente.co.za. Hierdie dien dus as finale kennisgewing van die datums van talentvertonings en geen verdere kennisgewings hoef deur die organiseerders uitgereik te word nie, tensy veranderings plaasvind. Die organiseerders kan ook die venue op kort kennisgewing verander.

Let wel: Die organiseerders sal uit hulle pad gaan om telkens ‘n nasionale en/of ‘n gevorderde Oos-Kaapse kunstenaars te reël as hoof kunstenaar by elke talentdag, maar kan nie kwalik geneem word as dit nie prakties of ekonomies moontlik is om dit gereël te kry nie.

BELANGRIK: DIE SLUITINGSDATUM VIR INSKRYWINGS IS IN FEITLIK AL DIE GEVALLE SOWAT TWEE WEKE VOOR DIE TALENTDAG – GEEN LAAT INSKRYWINGS SAL AANVAAR WORD NIE, JAMMER!!!

     PORT ELIZABETH:

      Venue: VODACOM AMFITEATER, BOARDWALK

Deelnemers moet soveel moontlik probeer deelneem en so goed moontlik presteer om te kwalifiseer vir die finale glansaand. Deelnemers kan ook op enige dorp deelneem en ook by soveel dorpe as wat hulle wil as hulle graag vinniger wil vorder.       

GRAAFF-REINET

Venue:           John Rupertteater

Deelnemers moet soveel moontlik probeer deelneem en so goed moontlik presteer om te kwalifiseer vir die finale glansaand. Deelnemers kan ook op enige dorp deelneem en ook by soveel dorpe as wat hulle wil as hulle graag vinniger wil vorder.

6 Februarie (sluitingsdatum vir inskrywings is 29 Januarie)

8 Mei (sluitingsdatum vir inskrywings is 24 April)

24 Julie (sluitingsdatum vir inskrywings is 10 Julie)

4 September (sluitingsdatum vir inskrywings is 21 Augustus)

9 Oktober (sluitingsdatum vir inskrywings is 24 September).

KIRKWOOD

Venue:           Hoërskool Kirkwood (skoolsaal)

Deelnemers moet soveel moontlik probeer deelneem en so goed moontlik presteer om te kwalifiseer vir die finale glansaand. Deelnemers kan ook op enige dorp deelneem en ook by soveel dorpe as wat hulle wil as hulle graag vinniger wil vorder.

24 April (sluitingsdatum vir inskrywings is 9 April) - HOOFKUNSTENAAR WORD AANGEKONDIG

22 Mei (sluitingsdatum vir inskrywings is 8 Mei) - HOOFKUNSTENAAR WORD AANGEKONDIG

14 Augustus (sluitingsdatum vir inskrywings is 31 Julie) - HOOFKUNSTENAAR WORD AANGEKONDIG

11 September (sluitingsdatum vir inskrywings is 28 Augustus) - HOOFKUNSTENAAR WORD AANGEKONDIG

16 Oktober (hierdie datum moet nog bevestig word) (sluitingsdatum vir inskrywings is 2 Oktober) - HOOFKUNSTENAAR WORD AANGEKONDIG

Wie mag deelneem?

Sangers en musikante van enige ouderdom mag deelneem. Die enigste voorwaarde is dat sangers hulle eie bykomende mikrofone moet voorsien indien hulle meer as een gaan benodig of betaal vir die huur van enige bykomende klanktoerusting indien dit deur hulle benodig of vereis word. Musikante moet ook hulle eie instrumente voorsien – geen instrumente sal deur GOUE DROME voorsien word nie, en hulle moet vooraf eers bepaal of daar bykomende klanktoerusting benodig sal word en vir die koste daarvan instaan.

Groepe is welkom om deel te neem, maar dit mag nie uit meer as 5 lede bestaan nie – dit word weer eens beklemtoon dat lede dan self verantwoordelik is vir bykomende klanktoerusting.

Kategorie-indelings

Voorlopige kategorie-indelings is soos hieronder uiteengesit (indelings vind plaas volgens die ouderdom van die deelnemer op die datum van die betrokke talentvertoning – ‘n bewys van geboortedatum moet asseblief saam met die jaarlikse aansluitingsvorm ingedien word).

Die kategorie-indelings vir instrumentaal en vokaal is dieselfde, maar mag ter enige tyd gewysig word sonder vooraf kennisgewing om alle deelnemers op die beste moontlike wyse te akkommodeer. Omdat dit die eerste keer is dat ons instrumente toelaat, sal daar waarskynlik heelwat aan die instrumentale kategorieë gewysig word totdat die indelings so goed as moontlik is.

By die GOUE DROME WOW!-STêR FINALE GLANSAAND (nadere besonderhede hieroor elders in hierdie dokument) word geen kategorie-indelings gedoen nie – ons beleid is dat dit ‘n tipiese situasie is waar deelnemers hulleself kan toets aan enige ander deelnemers in die mark – dus word ‘n gesimuleerde marksituasie geskep waar elkeen, ongeag ouderdom, moet meeding vir die beste moontlike posisie. Dieselfde geld ook vir kategorie-wenners wat aan die WOW!-rondte (sien hieronder) deelneem. Dit is tog immers so dat kunstenaars uiteindelik in die mark nie in kategorieë ingedeel word nie – hulle moet kompeteer met al die ander kunstenaars in die wêreld daarbuite.

WOW!-rondte

By elke talentdag word ‘n finale rondte gehou wat bekendstaan as die WOW!-rondte. Die WOW!-rondte vind plaas om 19:00 op die aand van elke talentdag en die hele vertoning wat gewoonlik ook ‘n hoofkunstenaar (na pouse) insluit staan bekend as ‘n GOUE DROME WOW!- vertoning.

Hier word die volgende kunstenaars die geleentheid gegee om deel te neem aan ‘n finale uitsing om die wenners van die pryse te bepaal (geen kategorie-indelings is hier betrokke nie – dus ‘n voorbereiding vir die SUPRA-aand waar dieselfde situasie geld):

Die wenners van elke kategorie op die gewone talentaande (dus SUPRA uitgesluit) dring deur na die WOW!-rondte waar geen beperking is op die ouderdom nie en waar ‘n algehele wenner vir die betrokke talentaand aangewys sal word. Indien min inskrywings ontvang word, kan die organiseerders besluit om meer plekke by elke kategorie ook te laat deurdring na die finale rondte. Diegene wat een of meer kere die WOW!-kategorie gewen het, sal nie weer aan ‘n kategorie deelneem nie OP VOORWAARDE DAT HULLE NIE ‘N ENKELE TALENTAAND MISLOOP NIE en hulle sal dus by elke talentvertoning vir die betrokke dorp/stad waar hulle aanvanklik gekwalifiseer het, kan deelneem aan die WOW!-kategorie. So ‘n deelnemer staan bekend as ‘n MINI WOW!-STêR.

Watter taal?

Die taal waarin ‘n liedjie gesing word is nie van belang nie. Alle liedjies sal op dieselfde grondslag beoordeel word. Indien jy egter vermoed dat die beoordelaars nie die taal van die liedjie sal verstaan nie, is dit goeie praktyk om saam met jou talentaand-inskrywingsvorm ‘n verduideliking / vertaling te stuur sodat hulle dit wel sal kan volg.

Groepe

Groepe van tot maksimum 5 lede mag ook deelneem. Duette word ook as ‘n groep beskou. Indien jy as solokunstenaar wil optree maar ook groepwerk wil doen saam met ‘n ander persoon of persone, moet die groep ook apart inskryf vir ‘n talentvertoning. Groepe wat van instrumente gebruik maak of meer as een mikrofoon benodig, moet self die bykomende instrumente en klanktoerusting voorsien of indien GOUE DROME dit voorsien, moet die deelnemers self daarvoor betaal.

Vorige wenners

Omdat die WOW!-STêR-reeks van talentdae in wese oor ontwikkeling van talent gaan, is dit ons mening dat ontwikkeling nie staak wanneer jy ‘n wenner is nie. Daarom glo ons dat alle vorige wenners weer welkom is om deel te neem aan enige opeenvolgende reekse. Deelnemers wat nog nie gewen het nie, word op hierdie wyse ook die geleetheid gebied om harder te werk en hulle bes te probeer om hulle standaard sodanig te verhoog dat hulle wel vorige wenners kan uitstof.

Sluitingsdatums

Om deel te neem aan die talentdae moet ‘n inskrywingsvorm ingevul word en die inskrywingsfooi betaal word. Die sluitingsdatum vir inskrywings om aan ‘n betrokke talentdag deel te neem is normaalweg veertien dae voor elke talentdag. Die invul van die INSKRYWINGSVORM is NET GELDIG VIR EEN TALENTDAG en aansoek moet daarvoor gedoen word ENIGE TYD VOOR DIE TALENTDAG, MAAR OP DIE LAATSTE VEERTIEN DAE VOOR ELKE TALENTDAG (SIEN DIE AMPTELIKE SLUITINGSDATUMS ELDERS IN HIERDIE DOKUMENT) SODAT DIE DEELNEMER SE PLEK IN DIE PROGRAM BESPREEK KAN WORD!! GEEN, MAAR GEEN LAAT INSKRYWINGS SAL AANVAAR WORD NIE!!

Slegs R60 inskrywingsfooi per inskrywing vir ‘n solo-item. Vir groepe is dit R20 per bykomende lid ekstra (as julle dus ‘n groep van vier is sal die inskrywingsfooi R60 plus 3 X R20 = totaal van R120 wees of ‘n duet sal byvoorbeeld R80 betaal.

Inskrywingsfooie is betaalbaar ten opsigte van elke talentvertoning en geld net vir een item wat gelewer word (behalwe dat oorspronklike liedjies in die oorspronklike kategorie gesing kan word teen geen ekstra inskrywingsfooi nie – slegs een liedjie per deelnemer wat vir ‘n ander kategorie ingeskryf het). Inskrywingsfooie is ook betaalbaar vir die FINAAL. Kategoriewenners wat deurgaan na die WOW-kategorie op dieselfde dag, betaal nie weer vir deelname aan die WOW-kategorie nie.

Inskrywingsfooie is nie terugbetaalbaar onder enige omstandighede nie, tensy die organiseerders die betrokke talentdag in geheel kanselleer. Bewys van betaling van die inskrywingsfooie moet saam met elke inskrywingsvorm ingedien word.

Inskrywingsfooie kan by die volgende bankrekening inbetaal word:

Talentdagprogramme

Slegs opbetaalde en goedgekeurde deelnemers wat hulle talentdag-inskrywingsvorms minstens veertien dae voor die talentdag ingedien het, sal by die talentdag-programme ingesluit word, tensy daar te veel deelnemers is en vooraf oudisies vir sifting gehou moet word.

Toegangsfooie

Behoorlik opbetaalde deelnemers betaal nie toegangsfooie tot die talentaande nie. ‘n Lys van opbetaalde deelnemers sal by die kaartjieverkooppunt wees waar die gratis kaartjie bekom kan word. GOUE DROME neem nie verantwoordelikheid om vir deelnemers sitplekke te reserveer nie. Dit is elke deelnemer se plig om self te sorg dat sy/haar gratis toegangskaartjie vooraf by die kaartjieverkooppunt afgehaal word. As die deelnemer dus nie ‘n sitplek het om op te sit nie, is dit net hy/sy self wat daarvoor geblameer kan word.

Kaartjies vir die gehoor kan slegs teen betaling verkry word by Hellen Scriven, Westway Kafee, Kaapweg, Newton Park, Port Elizabeth (tel 041 365 0217). BELANGRIK: GEEN KAARTJIES KAN DIREK BY GOUE DROME VERKRY WORD NIE EN KAN OOK NIE NAMENS ENIGIEMAND DEUR GOUE DROME UITGEHOU WORD NIE!! DIT IS ‘N GROOT KANS WAT MENS VAT OM NIE VOORAF TOEGANGSKAARTJIES AAN TE SKAF NIE ... DIT HET REEDS TALLE KERE IN DIE VERLEDE GEBEUR DAT MENSE MOES OMDRAAI BY DIE DEURE.

Toegangsfooie vir die publiek is soos volg:

Bywoning van die Junior Talentvertoning (gewoonlik so ongeveer 11:00) – R40, maar kan ook die Senior Talentvertoning (gewoonlik so ongeveer 15:00) bywoon met dieselfde kaartjie.

Bywoning van die Senior Talentvertoning (gewoonlik so ongeveer 15:00) – R40, maar kan ook die Junior Talentvertoning (gewoonlik so ongeveer 11:00) bywoon met dieselfde kaartjie.

Bywoning van die WOW!-vertoning (so ongeveer 19:00) waar die hoofkunstenaar van die aand ook optree – R50. Persone wat voor die tyd ‘n R50 kaartjie aanskaf, kan al die vertonings (Junior, Senior en WOW!) bywoon. R50 kaartjies het ‘n sitpleknommer wat net gedurende die aand geldig is – gedurende die dag se talentvertonings kan die gehoor op enige plekke sit. By sekere geleenthede waar hoofstroomkunstenaars, soos byvoorbeeld Eden of Theuns Jordaan optree, sal kaartjiepryse aansienlik hoër wees.

Voor-met-note

Alle lede van die gehoor kry geleentheid om deel te neem aan VOOR-MET-NOTE wat by elke WOW!-vertoning aangebied word tussen die optredes van die deelnemers aan die WOW!-kategorie. Drie lede van die gehoor word gekies om aan die VOOR-MET-NOTE deel te neem. Lede van die gehoor kan vooraf hulle name opgee daarvoor en indien daar meer belangstelling is as wat ons kan akkommodeer sal name uit ‘n hoed getrek word om te bepaal wie kan deelneem om van die kontant- en ander pryse te wen.

Pryse

Die volgende pryse sal toegeken word by talentvertonings (PRYSE KAN TER ENIGE TYD TERUGGETREK OF GEWYSIG WORD SOOS WAT OMSTANDIGHEDE DIKTEER – INDIEN DIE GELEENTHEDE BAIE GOED ONDERSTEUN WORD KAN DIE PRYSGELDE VERHOOG WORD):

MINI WOW!-STêR (Wenner van die WOW!-rondte op ‘n talentaand):

R200 (R300 as dit met ‘n oorspronklike liedjie verwerf word)

Tweede plek (WOW!-rondte):

R150 (R250 as dit met ‘n oorspronklike liedjie verwerf word)

Derde plek (WOW!-rondte):

R100 (R200 as dit met ‘n oorspronklike liedjie verwerf word)

Pryse vir die gehoor:

Die gehoor sal gedurende stemmings (wat per selfoon plaasvind) ‘n ontbyt vir twee by THE PAXTON HOTEL wen as hulle selnommer getrek word uit die lys van persone wat daardie aand per selfoon deelgeneem het.

Die volgende pryse sal toegeken word by die 2010 GOUE DROME WOW!-STêR GLANSAAND:

Beste kunstenaar - Goud:

R1 000 (R1 500 as dit met ‘n oorspronklike liedjie verwerf word)

ELNA BOTHA WISSELTROFEE VIR BESTE KUNSTENAAR (GOUD).

THE PAXTON HOTEL – naweekverblyf vir twee

ILOREEZ MEYER SANGAKADEMIE – een jaar sangonderrig

GOUE DROME WEBBLAD – een jaar blootstelling op hierdie webblad

Beste kunstenaar - Silwer:

R500 (R1 000 as dit met ‘n oorspronklike liedjie verwerf word)

HELLEN SCRIVEN WISSELTROFEE VIR DIE BESTE KUNSTENAAR (SILWER).

Beste kunstenaar -Brons:

R300 (R500 as dit met ‘n oorspronklike liedjie verwerf word)

FRANCOIS BEETS WISSELTROFEE VIR DIE BESTE KUNSTENAAR (BRONS)

Beste liedjie - Goud:

R1 000 (SLEGS OORSPRONKLIKE LIEDJIES WORD OORWEEG)

SAREL BOTHA WISSELTROFEE VIR DIE BESTE LIEDJIE (GOUD)

THE PAXTON HOTEL – naweekverblyf vir twee

ILOREEZ MEYER SANGAKADEMIE – een jaar sangonderrig

GOUE DROME WEBBLAD – een jaar blootstelling op hierdie webblad

Beste liedjie - Silwer:

R500 (SLEGS OORSPRONKLIKE LIEDJIES WORD OORWEEG)

Beste liedjie -Brons:

R300 (SLEGS OORSPRONKLIKE LIEDJIES WORD OORWEEG)

ELIZMA BEETS WISSELTROFEE VIR DIE BESTE LIEDJIE (BRONS)

Mees belowende kunstenaar:

R250 plus die JACQUES ARENDT WISSELTROFEE VIR DIE MEES BELOWENDE KUNSTENAAR.

Beste vordering:

R200 plus: Die ILOREEZ MEYER wisseltrofee vir die BESTE VORDERING word toegeken aan die kunstenaar wat deur die jaar volhard het en goed gevorder het, alhoewel hy/sy/hulle nie noodwendig daarin kon slaag om van die top pryse te verower nie. Die tipiese wenner van hierdie trofee sal iemand wees wat maand-vir-maand terugkom om deel te neem, luister na die raad wat gegee word en telkens verbeter – iemand met inspirerende deursettingsvermoë. Die drie hoofbeoordelaars van die 2010 WOW!-STêR reeks besluit oor hierdie toekenning na afloop van die laaste talentaand van die jaar.

Pryse vir die gehoor:

Die gehoor sal gedurende stemmings (wat per selfoon plaasvind) ‘n ontbyt vir twee by THE PAXTON HOTEL wen as hulle selnommer getrek word uit die lys van persone wat gedurende die WOW!-vertoning per selfoon deelgeneem het. Ander pryse sal deur die loop van die Junior- en Senior kompetisies aangebied word wanneer die gehoor stem.

Aantal deelnemers per talentdag en uitdunrondtes (indien nodig)

Die aantal deelnemers per talentdag kan beperk word om dit prakties uitvoerbaar te maak. Voornemende deelnemers wat nie voor die bostaande sluitingsdatums ingeskryf het nie, sal nie toegelaat word om deel te neem nie, SELFS AL HET HULLE REEDS VOORHEEN DEELGENEEM!

Indien heeltemal te veel inskrywings ontvang word om in een program in te sluit sal die volgende reëlings getref word:

‘n Uitdunrondte sal voor die aanvang van die talentdag gereël word.

Ons wil graag aan elke deelnemer goeie advies gee na sy/haar/hulle optrede waar daar verbeter kan word. Dit is belangrik om kennis te neem dat daar by die uitdunrondte ook kommentaar gelewer sal word sodat die kunstenaar weet in watter opsigte verbeter kan word. Die deelnemers aan die uitdunrondtes verdien ook punte wat in aanmerking kom vir die maandelikse ranglys – dus is ‘n uitdunrondte ook baie belangrik.

Die feit dat iemand wat aan die uitdunrondte deelgeneem het en dalk nie deurgedring het om deel te neem aan die talentvertoning nie, aangeraai word om die WOW!-STêR-dag in elk geval by te woon, is om so ‘n kunstenaar sodoende die geleentheid te gee om te luister na die talent wat wel deurgedring het en ook te luister na die kommentaar wat deur die beoordelaars aan die deelnemers gegee word. Dit is deel van die leerproses om kunstenaars bewus te maak hoe hulle nog kan verbeter. Dit is alles een groot sang-, choreografie en musiekles! Die waarde hiervan is onskatbaar!

Indiening van INSKRYWINGSVORMS

INSKRYWINGSVORMS kan per faks (086 514 6775) of per e-pos (elna@gouedrome.co.za) ingedien word. Dit is die deelnemer se verantwoordelikheid om toe te sien dat die inskrywingsvorms vir elke talentdag betyds teen die onderskeie sluitingsdatums deur die organiseerders ontvang word. U MOET ASSEBLIEF SEKER MAAK DAT U INSKRYWINGS BETYDS ONTVANG WORD DEUR BEVESTIGING DAARVAN TE VERKRY BY ELNA BOTHA.

Platemaatskappye

Enigeen wat nie formeel deur ‘n platemaatskappy ondersteun word nie, mag deelneem.

Watter liedjies en hoeveel mag gesing word?

Enige liedjie mag gesing word, mits die inhoud daarvan nie vulgêre of aanstootlike of swak taalgebruik uitbeeld nie. Die liedjie mag van enige genré wees en in enige taal gesing word. Deelnemers mag egter geen liedjies in dieselfde kalenderjaar herhaal wanneer hulle aan talentvertonings deelneem nie. Dit word egter toegelaat dat ‘n deelnemer wat aan die die finaal deelneem wel enige liedjie kan sing wat hy/sy/hulle deur die loop van die jaar by talentvertonings gesing het.

Die deelnemers wat via die BAY FM GOUE DROME TOP 5 LOCAL KLANKE gekwalifiseer het vir deelname MOET ‘n oorspronklike liedjie sing en mag net aan die OORSPRONKLIKE LIEDJIE-kategorie deelneem. Indien hulle aan ander kategorieë deelneem moet hulle formeel daarvoor inskryf en dus die inskrywingsfooi daarvoor betaal.

Die lengte van die liedjie wat gesing word mag nie 4 minute oorskry nie, maar moet verkieslik korter as 3 minute wees. Instrumentale werke moet ook beperk word tot maksimum 4 minute.

Wanneer die deelnemer ‘n begeleidingsnit op CD gebruik as begeleiding, mag geen hoofstem met melodielyn daarop wees nie.

Klanktoerusting

‘n Klankstelsel, mikrofoon en CD-speler sal beskikbaar wees – indien die deelnemer enige verdere klankbehoeftes het, skakel asseblief vir Elna by 082 706 9717 – neem asseblief in ag dat bykomende klank slegs voorsien kan word vir die koste van deelnemer, maar doen gerus eers vooraf daaroor navraag omdat ons werklik uit ons pad sal gaan om te help.

Beoordeling en gehoor se deelname aan stemming

Beoordelaars sal aangewys word en hulle punte sal 50% van die deelnemer se totale punt tel. Wat belangrik is, is dat die beoordelaars aan die kunstenaars raad sal voorsien wat hulle ter harte kan neem in hulle ontwikkelingsproses. Dit is ook noodsaaklik dat kunstenaars luister na die raad wat aan ander kunstenaars gegee word en ook daaruit leer. Die gehoor wat teenwoordig is, sal met hulle selfone kan stem en hulle punte sal 50% van die totale punt van die deelnemer tel. Deelnemers wat bewys kan lewer dat die werk wat hulle sing 100% oorspronklik is en dus deur hulleself of spesifiek vir hulleself geskryf is, kry outomaties ‘n 1% bonuspunt by hulle puntetotaal (behalwe in die oorsponklike kategorie).

Die uitslag is finaal en geen korrespondensie sal daaroor gevoer word nie.

Die lede van die gehoor wat met behulp van hulle selfone stem, word verplig om vir drie deelnemers van hulle keuse te stem in volgorde van voorkeur. Dit, tesame met ‘n deeglik oorweegde puntegewig aan elke stem, neutraliseer hoofsaaklik die effek van onregmatige oormatige stemme vir een betrokke deelnemer en die beoordelaars se 50% bydrae is die finale neutraliserende faktor.

Uitstel van kompetisie

Die kompetisie mag deur die organiseerders gekanselleer of uitgestel word indien omstandighede dit vereis.

Die GOUE DROME WOW!STêR glansaand

Deelnemers aan die 2010 GOUE DROME WOW!-STêR FINAAL (die glansaand wat op 27 November plaasvind) vind op uitnodiging plaas. Die uitnodigings word bepaal volgens ‘n ranglys wat soos volg werk:

Deelnemers verdien punte volgens die nagenoemde indelings:

PORT ELIZABETH

Deelnemers wat by meer as een dorp/stad deelneem sal vir elke dorp of stad ‘n aparte ranglyspunt verdien, byvoorbeeld PIET PIETERSE (KIRKWOOD) en PIET PIETERSE (PORT ELIZABETH) en kan dus meer as een keer op die ranglys verskyn en uiteindelik meer kanse verdien om die finale ranglys te haal om meer kere by die WOW!-STêR FINALE GLANSAAND op te tree.

Slegs 20 deelnemers word gekeur vir die WOW!-STêR-glansaand, en indien enige onttrekkings plaasvind word die eersvolgende kunstenaars volgens die finale ranglys die geleentheid gebied om deel van die finale 20 deelnemers te wees. GOUE DROME behou die reg voor om meer as 20 deelnemers op die finale ranglys te plaas. GOUE DROME sal ook deur die loop van die jaar ‘n ranglys van 30 of 40 deelnemers aankondig sodat die meeste deelnemers kan sien waar hulle geplaas is, maar slegs die TOP 20 sal aan die WOW!-STêR FINAAL deelneem.

Deelnemers MOET betyds aansoek doen

Alle deelnemers moet betyds aansoek doen vir elke talentdag anders sal hulle, ondanks die feit dat hulle moontlik reeds voorheen deelgeneem het, nie toegelaat word om aan die betrokke talentdag waarvoor hulle te laat ingeskryf het, deel te neem nie.

Is dit die moeite werd om later in die jaar in te skryf (as jy eers later bewus word van hierdie projek)?

Beslis, ja! Hoekom?

Bemarking van deelnemers

Deelnemers mag hulle persoonlike bemarkingsmateriaal uitstal en hulle eie albums te koop aanbied by WOW!-STêR-vertonings, maar omdat spasie beperk is en borge se bemarkingsmateriaal prominensie moet geniet, sal die organiseerders (GOUE DROME) aandui watter spasie die deelnemer mag benut vir hierdie doel. GOUE DROME sal die beste moontlike posisie hiervoor toeken, en deelnemers moet asseblief aanvaar wat ookal die besluit is hieroor is. Deelnemers mag egter nie enige produkte van ander kunstenaars of persone bemark nie en ook nie produkte wat nie direk verband hou met die deelnemer se bemarking as kunstenaar nie.

Deelnemers wat dus bemarkingsmateriaal wil uitstal in enige formaat ookal, moet dit op die inskrywingsvorm aandui en GOUE DROME sal besluit of dit paslik is en toegelaat kan word aldan nie.

Geen bemarking van ander projekte mag plaasvind by die GOUE DROME talentvertonings nie, tensy daar ooreengekom is op betaling vir sulke blootstelling of dat daar ‘n borgskapooreenkoms daarvoor bestaan. Die BAY FM / JIP Sangkompetisie het reeds regte verkry om hulle kompetisie te bemark.

U word ook aangeraai om nie sommer betrokke te raak by enige aanbiedings van persone wat allerhande projekte aanbied en deelnemers wil lok om daarby betrokke te raak nie. Deelnemers moet kennis neem dat nie-GOUE DROME projekte wat deur persone bemark word, as nie-amptelik beskou word en word nie deur ons ondersteun tensy dit uitdruklik deur ons bemark word nie. Selfs die insamel van kontakinligting by ons talentvertonings is teen ons reëls en word gladnie toegelaat nie – dit kom neer op die onwettige misbruik van ‘n platform wat deur ons kundigheid en harde werk daar gestel is. Geen persoon mag op die perseel waar ons die talentvertonings aanbied sulke inligting bymekaar maak nie. Projekte wat deur GOUE DROME geïnisieer of ondersteun word, sal beslis openlik deur ons bemark word – ander geleenthede vind nie onder die vlerk van GOUE DROME plaas nie en GOUE DROME neem dus geen verantwoordelikheid daarvoor nie en indien sodanige organiseerders GOUE DROME talentvertonings misbruik ten gunste van hulle eie doelwitte, sal daar beslis teen hulle opgetree word.

Vir die rekord word ook genoem dat kunstenaars wat deur GOUE DROME gekontrakteer is, slegs via GOUE DROME vir optredes bespreek mag word.

GOUE DROME is ten gunste daarvan dat deelnemers ook aan ander kompetisies moet deelneem, want dit is juis dit wat by ons talentvertonings geleer is wat sal help dat hulle goed presteer by ander talentkompetisies, maar in so ‘n geval moet die orgnaniseerder van so ‘n kompetisie oop kaarte met ons speel en die vereiste stappe (volledige skriftelike voorlegging) neem om goedkeuring te verkry vir watter bemarking hulle ookal wil doen. GOUE DROME behou egter steeds die reg voor om bemarking daarvoor by ons talentvertonings af te keur.

Webblad

Gereelde nuus, uitslae, ranglyste, aansluitingsvorms en talentdag inskrywingsvorms kan by www.talente.co.za verkry word of telefonies aangevra word by Elna Botha, telefoonnommer 082 706 9717.

OPSOMMING:

Hoe moet ek maak om alles te onthou en seker te maak dat ek nie enigiets misloop nie?

Luister elke Saterdag ongeveer 09:45 na die TOP 5 Local Klanke op BAY FM 107.9 (via die internet kan u by www.bayfm.co.za luister) om die nuutste Oos-Kaapse liedjies te hoor en die nuutste nuus rondom opkomende talent. Die TOP 5 sal in 2010 ook deur Radio Graaff-Reinet uitgesaai word. Nadere besonderhede hieroor sal later bekendgemaak word.

BORGSKAPPE

KONTANT-BORGE:

DIE WOW!-STêR reeks van talentvertonings trek baie aandag in die media en op radio en word wyd bemark. Dit is dus ‘n besliste voordeel om enige besigheid of produk via ‘n borgskap te adverteer. Op hierdie manier dra borge ook by tot die ontwikkeling van Oos-Kaapse talent. Hier is al die inligting wat borge benodig om ‘n ingeligte besluit te neem:

Sootgelyke talentvertonings word ook in Graaff-Reinet (met die ondersteuning van Radio Graaff-Reinet) aangebied. Dit word ook in Kirkwood aangebied.

Ons is buigbaar wat borgskap-opsies aanbetref en dit kan dus verwag word dat daar veranderings aangebring word met die verloop van tyd. Ons is ook oop vir voorstelle van potensiële borge.